Panchayat:Repo18/vol1-page0441

17. പ്രസംഗിക്കുന്നതിന്റെ ക്രമം.-

പ്രമേയം അവതരിപ്പിക്കുന്ന അംഗം പ്രസംഗിച്ചതിനുശേഷം മറ്റുള്ള അംഗങ്ങൾക്ക് പ്രമേയത്തെപ്പറ്റി അദ്ധ്യക്ഷൻ പേർ വിളിക്കുന്ന ക്രമമനുസരിച്ച് സംസാരിക്കാവുന്നതാണ്. അദ്ധ്യക്ഷൻ പേര് വിളിക്കുമ്പോൾ സംസാരിക്കാതിരുന്ന അംഗത്തിന് അദ്ധ്യക്ഷന്റെ പ്രത്യേകാനുമതിയോടുകൂടി മാത്രമേ ആ ചർച്ചയിൽ പിന്നീട് സംസാരിക്കാൻ അവകാശമുണ്ടായിരിക്കുകയുള്ളു.

18. പ്രസംഗങ്ങൾ എങ്ങനെ അനുവദിക്കുമെന്ന്.-

' മറ്റു വിധത്തിൽ വ്യവസ്ഥ ചെയ്തിട്ടില്ലാത്ത പക്ഷം ഒരേ വിഷയത്തെ സംബന്ധിച്ച് ഒന്നിൽ കൂടുതൽ പ്രാവശ്യം ഒരംഗം പ്രസംഗിക്കാൻ പാടില്ല. എന്നാൽ പ്രധാന വിഷയം ബൈലായുടേയോ ധനകാര്യ എസ്റ്റിമേറ്റുകളെയോ, അവയുടെ റദ്ദാക്കലോ ഭേദഗതിയോ സംബന്ധിച്ചുള്ളതാകുമ്പോൾ ഒരംഗത്തിന് ഒന്നിൽ കൂടുതൽ പ്രാവശ്യം ആ വിഷയത്തെ സംബന്ധിച്ച് ഭേദഗതി അവതരിപ്പിക്കുകയോ പിന്താങ്ങുകയോ ചെയ്യാവുന്നതാണ്.

19. വ്യക്തിപരമായ വിശദീകരണം.-

ഒരു ചർച്ചയുടെ ഭാഗമല്ലാതെ തന്നെ പഞ്ചായത്തു മുമ്പാകെ അദ്ധ്യക്ഷന്റെ അനുമതിയോടുകൂടി ഒരംഗത്തിന് വ്യക്തിപരമായ വിശദീകരണം നൽകാവുന്നതാണ്. 

20. പ്രസംഗത്തിന്റെ ദൈർഘ്യം.-

പഞ്ചായത്ത് മുമ്പാകെയുള്ള ഒരു സംഗതിയിൽ പ്രസംഗിക്കുവാൻ ആഗ്രഹിക്കുന്ന ഏതൊരംഗവും അത് രേഖാമൂലം അദ്ധ്യക്ഷനെ അറിയിക്കേണ്ടതും അദ്ധ്യക്ഷൻ മുൻഗണനാക്രമത്തിൽ അംഗങ്ങളെ വിളിക്കേണ്ടതുമാണ്. ഒരു പ്രസംഗവും സാധാരണയായി 4 മിനിട്ടിൽ അധികം ദൈർഘ്യമുള്ളതാകാൻ പാടില്ലാത്തതാണ്. എന്നാൽ ഒരു പ്രമേയമോ, ഭേദഗതിയോ അവതരിപ്പിക്കുന്നയാൾക്ക് അത് അവതരിപ്പിച്ച സംസാരിക്കാൻ 8 മിനിറ്റ് വരെ സമയം അനുവദിക്കാവുന്നതാണ്; എന്നിരുന്നാൽതന്നെയും അദ്ധ്യക്ഷന് യുക്താനുസരണം ഒരംഗത്തിന് പ്രസംഗിക്കുന്നതിനുള്ള സമയം കൂട്ടിയോ കുറച്ചോ നൽകാവുന്നതാണ്.

21. കമപ്രശ്നവും അതിന്മേലുള്ള തീരുമാനവും.-

(1) ഏതൊരംഗത്തിനും ഈ ചട്ടങ്ങൾ പാലിക്കപ്പെടുന്നതിനെപ്പറ്റിയോ, പഞ്ചായത്തിന്റെ നടപടിക്രമങ്ങൾ നിയന്ത്രിക്കുന്നതിന് പഞ്ചായത്തുണ്ടാക്കിയ ഏതെങ്കിലും ബൈലായുടെ വ്യാഖ്യാനത്തെപ്പറ്റിയോ അതുമായി ബന്ധപ്പെട്ട അദ്ധ്യക്ഷന്റെ അധികാരപരിധിയെപ്പറ്റിയോ ചോദ്യരൂപത്തിൽ ക്രമപ്രശ്നം ഉന്നയിക്കാവുന്നതാണ്. 

(2) കാര്യപരിപാടി തുടങ്ങുന്ന അവസരത്തിൽതന്നെ ക്രമപ്രശ്നം ഉന്നയിക്കാവുന്നതാണ്. എന്നാൽ ക്രമപ്രശ്നം പഞ്ചായത്ത് മുമ്പാകെയുള്ള കാര്യപരിപാടി തിട്ടപ്പെടുത്തുന്നതോ ക്രമപ്പെടുത്തുന്നതോ സംബന്ധിച്ചുള്ളതാണെങ്കിൽ കാര്യപരിപാടിയിലെ ഒരു ഇനം അവസാനിപ്പിച്ച് മറ്റൊന്ന് തുടങ്ങുന്നതിന് ഇടയ്ക്കുള്ള സമയത്ത് പ്രസ്തുത ക്രമപ്രശ്നം ഉന്നയിക്കാൻ അനുവദിക്കാവുന്നതാണ്.

(3) (1)-ഉം (2)-ഉം ഉപചട്ടങ്ങളിലെ നിബന്ധനകൾക്ക് വിധേയമായി ഒരംഗത്തിന് ഒരു ക്രമപ്രശ്നം കൊണ്ടുവരാവുന്നതും, അത് ഒരു ക്രമപ്രശ്നം തന്നെയാണോ എന്ന് അദ്ധ്യക്ഷൻ തീരുമാനിക്കേണ്ടതും അതിന്മേലുള്ള തീരുമാനം അന്തിമമായിരിക്കുന്നതുമാണ്.

(4) ഒരു അംഗം ഉന്നയിച്ച ക്രമപ്രശ്നത്തിന്മേൽ ചർച്ച അനുവദിക്കേണ്ടതില്ലാത്തതും എന്നാൽ അദ്ധ്യക്ഷന് യുക്തമെന്ന് തോന്നിയാൽ തീരുമാനം എടുക്കുന്നതിന് മുമ്പ് അംഗങ്ങൾക്ക് പറയാനുള്ളത് പറയാൻ അവസരം നൽകാവുന്നതുമാണ്.

(5) ഒരു ക്രമപ്രശ്നം ഉന്നയിക്കുക എന്നത് ഒരു അംഗത്തിന്റെ അവകാശമായിരിക്കുന്നതല്ല.

(6) ഒരംഗം താഴെപ്പറയുന്ന കാര്യങ്ങൾക്കായി ക്രമപ്രശ്നം ഉന്നയിക്കുവാൻ പാടുള്ളതല്ല;-

(എ) ഏതെങ്കിലും വിവരം അറിയാൻ വേണ്ടി;

(ബി) തന്റെ നിലപാട് വിശദീകരിക്കാൻ വേണ്ടി;

(സി) അവതരിപ്പിച്ചുകൊണ്ടിരിക്കുന്ന പ്രമേയത്തെക്കുറിച്ച്;

(ഡി) സാങ്കൽപ്പികമായ സംഗതികളെക്കുറിച്ച്.

This page is Accepted in Panchayath Wiki Project. updated on: 29/ 05/ 2019 by: LejiM

വർഗ്ഗം:റെപ്പോയിൽ സ്വീകരിച്ച ലേഖനങ്ങൾ