Panchayat:Repo18/vol1-page0437

യാതൊരു ക്രമ പ്രശ്നത്തെപ്പറ്റിയും യാതൊരു ചർച്ചയും ഉണ്ടായിരിക്കാൻ പാടില്ലാത്തതും ഏതെങ്കിലും ക്രമപ്രശ്നം സംബന്ധിച്ച് അദ്ധ്യക്ഷൻ കൈക്കൊള്ളുന്ന തീരുമാനം ആക്ടിലോ ഈ ചട്ടങ്ങളിലോ മറ്റു വിധത്തിൽ വ്യവസ്ഥ ചെയ്തിട്ടുള്ള പ്രകാരമൊഴികെ അന്തിമമായിരിക്കുന്നതുമാണ്.

(4) ഏതെങ്കിലും അംഗം ക്രമരഹിതമായി പെരുമാറുകയും യോഗം നടത്തുന്നതിനു തടസ്സമുണ്ടാക്കുകയും ചെയ്യുന്ന പക്ഷം, അദ്ധ്യക്ഷൻ ആ അംഗത്തോടു ഉടൻ പുറത്തുപോകാൻ നിർദ്ദേശിക്കേണ്ടതും ആൾ അതു അനുസരിച്ചില്ലെങ്കിൽ അദ്ധ്യക്ഷനു അയാളെ, ആ ദിവസത്തേക്കു സസ്പെന്റ് ചെയ്യാവുന്നതും അങ്ങനെ സസ്പെന്റ് ചെയ്യപ്പെട്ട ആൾ അതിനുശേഷം ഉടൻ തന്നെ യോഗത്തിൽ നിന്നും പുറത്തു പോകേണ്ടതും അതിൽ വീഴ്ച വരുത്തുന്ന പക്ഷം ആവശ്യമെങ്കിൽ ന്യായമായ ബലമുപയോഗിച്ചു അയാളെ നീക്കം ചെയ്യാവുന്നതുമാണ്.

10. യോഗ തീരുമാനം.-

പഞ്ചായത്തു യോഗത്തിന്റെ പരിഗണനയ്ക്കു വരുന്ന എല്ലാ വിഷയങ്ങളിലും യോഗത്തിൽ ഹാജരുള്ള അംഗങ്ങളുടെ ഭൂരിപക്ഷ വോട്ടുപ്രകാരം തീരുമാനമെടുക്കേണ്ടതും, വോട്ടുകൾ തുല്യമാക്കുന്ന എല്ലാ സംഗതികളിലും അദ്ധ്യക്ഷനു ഒരു കാസ്റ്റിംഗ് വോട്ടു കൂടി വിനിയോഗിക്കാവുന്നതുമാണ്.

11. പ്രമേയം റദ്ദുചെയ്യുകയോ ഭേദഗതി ചെയ്യുകയോ ചെയ്യൽ.-

പഞ്ചായത്തിന്റെ ഏതൊരു പ്രമേയവും അതു പാസ്സാക്കിയ തീയതി മുതൽ മൂന്നു മാസത്തിനകം ഈ പ്രത്യേക ആവശ്യത്തിനായി വിളിച്ചുകൂട്ടിയ യോഗത്തിൽ, പഞ്ചായത്തിന്റെ മുഴുവൻ അംഗസംഖ്യയുടെ മൂന്നിൽ രണ്ടു ഭാഗം അംഗങ്ങൾ അംഗീകരിച്ച ഒരു പ്രമേയത്തിലൂടെ അല്ലാതെ ഭേദഗതി ചെയ്യുകയോ മാറ്റം വരുത്തുകയോ റദ്ദ് ചെയ്യുകയോ ചെയ്യാൻ പാടില്ലാത്തതാകുന്നു.

എന്നാൽ പഞ്ചായത്ത് പാസ്സാക്കിയ ഒരു തീരുമാനം അല്ലെങ്കിൽ പ്രമേയം നിയമാനുസൃതം പാസ്സാക്കിയതല്ലെന്നോ, ആക്റ്റ് പ്രകാരം പഞ്ചായത്തിൽ നിക്ഷിപ്തമായ ഏതെങ്കിലും അധികാരത്തിന്റെ ലംഘനം അഥവാ ദുർവിനിയോഗമാണെന്നോ അല്ലെങ്കിൽ അത് നടപ്പിലാക്കിയാൽ മനുഷ്യ ജീവനോ ആരോഗ്യത്തിനോ പൊതു സുരക്ഷയ്ക്കോ അപകടമാകുമെന്നോ പഞ്ചായത്തിന് ബോദ്ധ്യം വന്നാൽ പ്രസ്തുത തീരുമാനം അഥവാ പ്രമേയം എപ്പോൾ വേണമെങ്കിലും പഞ്ചായത്തിന്റെ മുഴുവൻ അംഗസംഖ്യയുടെ പകുതിയിലധികം അംഗങ്ങളുടെ അംഗീകാരത്തോടു കൂടി പഞ്ചായത്തിന് ഭേദഗതി ചെയ്യുകയോ റദ്ദാക്കുകയോ ചെയ്യാവുന്നതാണ്.

12. അംഗങ്ങൾ പ്രസിഡന്റിനോടും സ്റ്റാൻഡിംഗ് കമ്മിറ്റി ചെയർമാനോടും ചോദ്യങ്ങൾ ചോദിക്കൽ-

(1) യോഗത്തിൽ പ്രസിഡന്റിനോടോ ഒരു സ്റ്റാൻഡിംഗ് കമ്മിറ്റി ചെയർമാനോടോ ചോദ്യം ചോദിക്കാൻ ആഗ്രഹിക്കുന്ന അംഗം ഏറ്റവും കുറഞ്ഞത് ഏഴു പൂർണ്ണദിവസങ്ങൾ മുമ്പുതന്നെ താൻ ചോദിക്കാൻ ഉദ്ദേശിക്കുന്ന ചോദ്യത്തിന്റെ ഒരു കോപ്പി, ചോദ്യം പ്രസിഡന്റിനോട് ആണെങ്കിൽ പ്രസിഡന്റിനും, ചോദ്യം ഒരു സ്റ്റാൻഡിംഗ് കമ്മിറ്റി ചെയർമാനോട് ആണെങ്കിൽ പ്രസി ഡന്റിനും ആ സ്റ്റാൻഡിംഗ് കമ്മിറ്റി ചെയർമാനും നൽകിയിരിക്കേണ്ടതാണ്.

എന്നാൽ പ്രസിഡന്റിനു യുക്തമെന്നു തോന്നുന്ന പക്ഷം ഏഴു ദിവസത്തിൽ കുറഞ്ഞ നോട്ടീസ് നൽകിക്കൊണ്ട് ചോദ്യം ചോദിക്കാൻ അനുവദിക്കാവുന്നതാണ്.

(2) അംഗങ്ങളുടെ ചോദ്യങ്ങൾ പഞ്ചായത്തിന്റെ ഭരണപരമായ പരിധിയ്ക്കുള്ളിൽ വരുന്ന സംഗതികളെ സംബന്ധിച്ചുമാത്രമുള്ളവയായിരിക്കേണ്ടതാണ്.

(3) പഞ്ചായത്തിനെ സംബന്ധിക്കുന്ന ഏതു സംഗതിയെപ്പറ്റിയും വിവരങ്ങൾ ശേഖരിക്കാനായി ഏതു യോഗത്തിൽ ഏതൊരു അംഗത്തിനും പരമാവധി രണ്ടു ചോദ്യങ്ങൾ വരെ ചോദിക്കാവുന്ന താണ്.

(4) താഴെ പറയുന്ന വ്യവസ്ഥകൾ പാലിക്കുന്നില്ലെങ്കിൽ ഒരു ചോദ്യവും അനുവദിക്കപ്പെടേണ്ടതില്ല:-

(എ)അത് ഒറ്റ സംഗതിയെ സംബന്ഝിച്ചതാകണം;

(ബി) അത് വ്യക്തമായതും ചുരുക്കത്തിലുളളതും ആയിരിക്കണം;

This page is Accepted in Panchayath Wiki Project. updated on: 29/ 05/ 2019 by: LejiM

വർഗ്ഗം:റെപ്പോയിൽ സ്വീകരിച്ച ലേഖനങ്ങൾ